حكاية الثورة

 

هو انتى عمرك كام سنة
وانا .. عمرى كام ؟
ضهرى انحنى
وحسبت عمرى ألف عام نمت فى ضل الستاير
ولما طل يناير ..
من تانى اتولدت
ووجدت محبوبتى المسنة
بنوتة أبرأ من بياض السنة
بنوتة تسمع من السما حدوتة

كان ياما كان فى الميدان
عمال وطلبة ودكاترة وفلاحين
وكام جندى وكام فنان
مليون بنت وولد
كل البلد فى الميدان

كل البلد سهرانة قلقانة
خايفة من غموض بكرة

إيديها على قلبها وعينيها عالأوكرة
من القلق .. كل الحياة بتعطل
كل القهاوى تفور
يا حشرجة فى الزور
ايه بقى القصة ؟
جه ولا لسة ؟

لسة ماجاش
نزل المظاهرة الصبح
والليل آتى بالقبح
وبصرخة الخفاش
وهو لسة ماجاش

نزل فى يوم جمعة
مع ناس مايعرفهمش
مشى وراهم او ورا احساسه
لقى البيوت مبتسمة
والشعب أهله وناسه

لقى البيوت مبتسمة
بتقوله اوعى تخاف
لقى الملايكة خفاف
فى قلوب المصريين
بيهتفوا ويهتف
يتجمعوا يتطمن
مع إن المكان متأمن بقنابل مسيلة للدموع

مع أول لسعة زور
ومفيش دكتور
وف نفس الوقت
القنبلة التانية فى السما محدوفة
كان هايموت ..
بس الامل صحاه ونفخ فى عينيه المطروفة

الأمل

الأمل هو المصريين فى المظاهرة
كام ألف زهرة بتتسقى بريحة الوطن
قال الشاطر حسن فى ميدان الجلاء ساعة الإختناق
القنابل مسيلة
لكن قلوبنا جميلة

اتفرقوا ساعة الرصاص الحى
او زى بلى بينتشر فى الحى
تاهت منه

قررت ترجع لبيتها مشى
أصحابها مش عارفين يوصلوا التحرير
وهى راجعة فى إتجاه سينما التحرير
غضبانة وعطشانة
وطول السكة فى بالها حاجة واحدة
طب دلوقتى مفيش تاكسيات ولا تليفونات
يا هل ترى ايه العمل لو ..

قاطعها واحد ظهر فى سكتها رعبها
ومن غير ما يفتح بقه

إداها فى ايديها علم مصر
وابتسم ومشى

:)

رجعتلها ضحكتها !

الليل دخل
والرعب قدام الشاشة الخادعة البكاشة
والـ بيعلق عاللى بيموتوا
كأنه من كوكب بلوتو
قولة آه بتعلمنا قولة لأ
والشعب طول عمره الأحق
وانتوا الـ غلط
بعنفه هو الأرق
وكلامكم المعسول زلط !!
قال المذيع

الدنيا ربيع
كله زى الفل
كله مية مية
يمكن أعمال شغب
يجوز قلة ادب
أو يمكن حرامية وماتهزش شنب
شنب الحكومة تقيل
والجو بديع وجميل
مفيش أبداً خطر
دى مؤامرة من قطر

الرعب قدام الشاشة
وفى الشوارع دمار ودم ونار
الأب حايشة كلامه نشرة الأخبار
والأم مش سامعة غير الجرس
على خدها الدمعة
خرج نهار جمعة
ولسة ماجاش
بتقول يا رب

بصوت مكتوم

معلوم
الليل بيزوم
بس النهار جنة لشعب مش مهزوم
لشعب مش منكسر
تعرف تغنى منتصر ؟
تعرف تعيش منتصر ؟
تعرف تموت منتصر ؟
خرج شبابنا منفجر نهار جمعة
ولسة ماجاش

فيه إيه يا عم
اهدى
الشوارع غرقت دم !
مهما تحرقنى
مهما ترميلى قنابل او مولوتوف
برضه ريحتك خوف !
يا جبان ..

يا مخربين يا قلة يا مندسة
بالقى ف عذابكم لذة
نام يا وطن واتمسى
ده الليل يفتح صقور

إتلهى
النور صحى
واحنا 3 مليون
بنغنى فى التحرير
واذا كنت رافض للتغيير
بالعند فيك الدنيا بتتغير
وان كنت مصر تبقى صغير
الثورة قامت فى الميدان

قولتلها بحبك فى الميدان
قالتلى

وانا كمان !

كل البلد فى الميدان
جمهورية جديدة تعظم الإنسان
بيسهروا ويغنوا
بيحلموا ببكرة
وبيدافعوا عن بعض
وقلبهم على بعض
الثورة خلت الانسانية تزور الارض
انا شوفتها بعينيا

كل الناس إيد واحدة
تمانين مليون وردة
الثورة رضيعتنا
ومصر هى الوالدة

دكتور المستشفى الميدانى لما تعبت

شفانى ..
الثورة ماخليتش حد أنانى
وخلت كل الناس إيد واحدة

كل الناس إيد واحدة
إيدين شباب أقباط كردون حوالين المسلمين ساعة الصلاة
وشيوخ الازهر بيحضروا القداس
والشمس تظهر والنور ملا الميدان
ادان .. ترانيم

ماكونتش عمرى اتخيل أن الحياة مش غابة
وإن إحنا مش مساكين وغلابة
إن إحنا بجد زى الاغانى والحواديت وكتب التاريخ ما قالت
ولا عمرى كنت اتخيل نفسى فى إشارة مع دبابة
ساعات باقول مش فاهمة
وساعات باقول بكرة احلى
وبابتسم بهدوء
وساعات باقول زى ما بيقولوا
ارفع راسك فوق
انت مصرى

فوق فوق بص لفوق
انت مصرى
نادى يا مصرى بشوق
انت مصرى
انت مكان وغيطان
وانت لقا واحضان
وانت مية وضوء
انت مصرى !

هو مصرى
ابنى الـ اختفى من نهار الجمعة
دلوقتى بس عرفت هو فين
هو ف الجنة

استنى !
فاضل على الجنة سبع سماوات
مش برضو فاضل غنوة تتغنى ؟

لسة الربيع يا رضيع مابتداش
مش كنت مستنى جمال ورده ؟
مش عيد ميلادك بكرة او بعده ؟
مش برضو كنت تطل على ماما !!
يحمى شبابك للملايكة البيض
يا قلب اخضر جديد
بتضحك رغم موتك
انا سامعة صوتك من السماوات

الأمهات والشهداء يتواصلوا فى صلاة الفجر
فى أمنيات راس السنة او فى ليلة القدر
فى فرحة الطفل بهدومه الجديدة
فى قصيدة عالوطن الـ عمره ما مات
مش ناوى تبعت يا شهيد سلامات ؟

الشهدا طايرين فى السحاب وف قلبهم أغنية
وف وشهم بصة شباب وريحة الحرية

والعيد بيتجدد مع ابتسامة الشهيد من الجنة
مع بصته لينا ودعواتنا ليه
الشمس طلعت ونورت بنور زيادة عن اللزوم
وحكت حكاية 18 يوم نضال
من المسيرة البيضا
لهجوم الجمال
امبارح عدى بس سايب آثاره
وبكرة لسة ف إنتظاره
و 11 - 2 - 11
تاريخ عمره ما هايتنسى
تاريخ مسجل فرحة وإنسانية وعند وغضب وخوف وسياسة وخيم ومسارح
وكلام عن امبارح
ودم !
وكلام اكتر عن بكرة
علشان الـ جاى اهم

فوق فوق بص لفوق
انت مصرى
نادى يا مصرى بشوق
انت مصرى

انت مكان وغيطان
وانت لقا واحضان
انت مية وضوء
انت مصرى

روح روح غنى بروح
انت مصرى
صوتك يشفى جروح
انت مصرى

انت وطن وشهيد
وانت دعاء ونشيد
انت طيور وسطوح
انت مصرى

فوق فوق بص لفوق
انت مصرى
نادى يا مصرى بشوق
انت مصرى

حكاية الثورة - أحمد حداد